У Манголіі затрымалі фізыка-атамніка Ажароўскага, пасьлядоўнага крытыка БелАЭС

Расейскі фізык-ядравік Андрэй Ажароўскі 19 жніўня паведаміў пра яго затрыманьне ў Манголіі. Паводле ягонай публікацыі ў Тэлеграме, яго затрымалі, павезьлі спачатку ва Ўлан-Батар, затым у бок мяжы. Прычынаў затрыманьня яму не растлумачылі, але абыходзіліся «бяз хамства і гвалту».

Ажароўскі праводзіў замеры радыяактыўнасьці на «гары старых радыяактыўных адыходаў» на паўночным усходзе Манголіі. Выданьне The Insider расказала, што Ажароўскага запрасілі мясцовыя экалягічныя актывісты, якія западозрылі забруджваньне каля месца здабычы ўрану. У мангольскіх мэдыя выданьне заўважыла «мэдыякампанію» супраць Ажароўскага: ён нібы «агент КДБ, шпіён, які прыехаў сарваць плённую супрацу Манголіі й Францыі ў здабычы ўрану».

Андрэй Ажароўскі часта крытыкаваў праекты, зьвязаныя з радыяцыяй, у тым ліку Беларускую АЭС у Астраўцы.

Фізык-атамнік пракамэнтаваў у сваім тэлеграм-канале падзеі апошніх гадзін:

«Бессэнсоўныя кіданьні па стэпе (спачатку ехалі ў Чайбалсан, потым да расейскай мяжы, потым зноў у Чайбалсан) занялі амаль 12 гадзін. Дарогаю супрацоўнікі дзяржаўных службаў Манголіі, якія затрымалі мяне, так і не адказалі на два мае пытаньні: у чым прычына затрыманьня і чаму нельга правесьці апытаньне-допыт на месцы. Я перакананы, што мае дзеяньні для кантролю радыяцыйнай абстаноўкі ў раёне разьмяшчэньня небясьпечных радыяактыўных адыходаў не парушаюць законаў, правілаў і звычаяў Манголіі».

З консульствам Расеі ў Манголіі Ажароўскі змог стэлефанавацца таксама толькі праз 12 гадзін пасьля затрыманьня.

Дарнодзкае ўранавае радовішча, якое паехаў дасьледаваць Ажароўскі, пачалі распрацоўваць у 1970-я гады для патрэбаў ядзернай праграмы СССР, у тыя ж гады там узьнік пасёлак Эрдэнэс (пасьля перайменаваны ў Мардай), дзе жылі пераважна савецкія грамадзяне. Пасьля распаду СССР у пачатку 1990-х пасёлак апусьцеў.

У пачатку 2025 году Манголія і Францыя падпісалі інвэстыцыйную дамову аб супрацы ў праекце здабычы ўрану. Андрэй Ажароўскі сьцьвярджае, што француская кампанія Orano Mining вядзе здабычу ўрану ў Манголіі некарэктна.